Եթե ձմռանը Շվեյցարիան գրավում է իր լեռնադահուկային սպորտաձևերով (դահուկներ, բոբսլեյ, սնոուբորդ և այլն) ապա ամռանը Ձեզ անմոռանալի բերկրանք կպատճառեն երկրի բազմաթիվ լճերի ափամերձ զբոսանքները կամ քայլարշավները Ալպյան հովիտներում:
Լեռնարշավային ճանապարհացանցը քաջ ծանոթ է աշխարհի ակտիվ հանգստի սիրահարներին: Շնորհիվ սարահարթային դյուրին ուղիների, ինչպես նաև այնպիսի ճանապահների, որոնք տանում են դեպի ձնառատ լեռնագագաթներ, Շվեյցարիան համարվում է քայլարշավային դրախտ ինչպես սկսնակների և քիչ նախապատրաստվածների, այնպես էլ մասնագետ լեռնագնացների համար:
Երկրում գոյություն ունեն 60 հազար կմ-ից ավելի նշված քայլարշավային երթուղիներ, որոնք սփռված են գեղատեսիլ մարգագետիններում, անտառներում, լեռնահովիտներում, բարձր լեռնային հատվածներում` մինչև հավերժական ձյան սառցադաշտեր (Ալեչի սառցադաշտ, Թրիֆտի սառցադաշտ և այլն):
Ճանապարհամերձ քարերի վրա կարելի է նշմարել վառ դեղնավուն նշաններ, որոնք ցույց են տալիս քայլարշավային ուղիների բարդության տարբեր աստիճաններ: Հեշտ քայլարշավային ճանապարհներով դուք կարող եք անցնել ինքնուրույն` առանց մասնագետ լեռնագնացի ընկերակցության: Եթե պատրաստվում եք բարձրանալ լեռներն ի վեր` ընդհուպ մինչև սառցադաշտեր, ապա առաջարկում ենք պարտադիր կերպով օգտվել տեղի մասնագետ լեռնագնացի ծառայություններից: Քայլարշավային բոլոր ուղիները կապված են ավտոբուսների, ճոպանուղիների և լեռնային ավտոբուսների տրանսպորտային ցանցի հետ:
Ամառը քայլարշավային ճանապարհորդությունների հիմնական սեզոնն է, չնայած բազմաթիվ երթուղային նշաններ կան և ձմռանը, ինչը և թույլ է տալիս քայլարշավային ճանապահորդությունների սիրահարներին տարին բոլոր զմայլվել Ալպյան հրաշալի լեռնաշխարհով, լճերով, գետերով և սառցադաշտերով: Քայլարշավների և էքսկուրսիաների համար նախատեսված քարտեզներ կարող եք ձեռք բերել տեղի տուրիստական տեղեկատու գրասենյակներից կամ գնել գրախանութներից:
Լեռնային արշավների իրականացման լավագույն ժամանակահատվածը մայիսից հոկտեմբեր ընկած ամիսներն են: Ձմռանը նույնպես հնարավոր է քայլարշավ ձեռնարկել, քանի որ արահետները միշտ մաքրվում են և կրում են համապատասխան նշաններ: Թե՛ ամռանը և թե՛ ձմռանը Ալպյան բարձրաբերձ լեռներն ու լեռնագագաթները ձեզ կմատուցեն բերկրանքի անմոռանալի պահեր:
rus | arm | eng 
